Türkmenistanyň Prezidenti Awazada Merkezi Aziýa döwletleriniň we Azerbaýjanyň Baştutanlarynyň konsultatiw duşuşygyny açdy

Türkmenistanyň Prezidenti Serdar Berdimuhamedow Awazada Merkezi Aziýa döwletleriniň we Azerbaýjanyň Baştutanlarynyň konsultatiw duşuşygyny açdy. Döwlet Baştutany öz çykyşynda hyzmatdaşlygyň esasy ileri tutulýan ugurlaryny kesgitledi we dünýäde çalt üýtgeýän ýagdaýlaryň hem-de täze ýüze çykýan howplaryň şertlerinde sebit döwletleriniň we Azerbaýjanyň «el-ele berip» bilelikde hereket etmeginiň möhümdigini nygtady. Bu barada Halkara habarlar merkezi habar berýär.

Türkmenistanyň Prezidentiniň bellemegine görä, şeýle üýtgeşmeleriň şertlerinde netijeli dolandyryşyň we ýagdaýlara aýgytly jogap bermegiň ähmiýeti barha artýar. Gepleşikleriň esasy maksady daşary syýasatda, howpsuzlyk ulgamynda, söwda gatnaşyklarynda, şeýle hem ylym, bilim we ynsanperwer ugurlarda taraplaryň mümkinçiliklerini, mümkin boldugyça, doly durmuşa geçirmekden ybaratdyr.

Prezident milli ykdysadyýetleriň depginli ösmeginiň, olaryň diwersifikasiýalaşmagynyň we tehnologik taýdan kämilleşmeginiň giň gerimli strategik wezipeleri öňde goýmaga mümkinçilik berýändigini belledi. Duşuşykda sebiti dünýä ähmiýetli iri logistika we energetika merkezleriniň biri hökmünde berkitmäge aýratyn üns berilýär.

Gatnaşyjylar üçin üýtgewsiz ileri tutulýan ugurlaryň biri bolan doganlyk halklaryň umumy ruhy, medeni we gymmatlyklar giňişligini gorap saklamak meselesine hem aýratyn ähmiýet berilýär.