Parižde «Türkmenaragatnaşyk» agentligi bilen fransuz kompaniýalarynyň arasynda gepleşikler geçirildi

25-nji aprelde Fransiýanyň paýtagty Parižde geçýän Türkmenistanyň energetika toplumyna daşary ýurt maýa goýumlaryny çekmek boýunça halkara forumyň (TEIF — 2024) çäginde Türkmenistanyň Ministrler Kabinetiniň ýanyndaky Ulag we kommunikasiýalar agentliginiň «Türkmenaragatnaşyk» agentliginiň başlygy ýerli kompaniýalaryň ikisiniň «Airbus» we «THALES SIX GTS France SAS» kompaniýasynyň ýolbaşçylary bilen duşuşyklary geçirdi. Duşuşyklarda taraplar kosmos ugry boýunça ikitaraplaýyn hyzmatdaşlygyň meselelerini ara alyp maslahatlaşdylar.

Bütin dünýäde ygtybarly hyzmatdaş hökmünde uly abraýdan peýdalanýan Türkmenistana kosmos ulgamy boýunça hyzmatlaryny hödürledi. Munuň özi dürli ugurlar, şol sanda kosmos ulgamynyň işine tehnologiýalaryň iň kämil nusgalaryny ornaşdyrmak boýunça ähmiýetli işleri durmuşa geçirýän Türkmenistanyň mümkinçiliklerine berilýän ýokary bahanyň nyşanydyr.

Duşuşygyň barşynda «Türkmenaragatnaşyk» agentligi bilen bu kompaniýalaryň arasyndaky hyzmatdaşlygyň geljegi hem ara alnyp maslahatlaşyldy. Elbetde, bu taraplaryň arasyndaky hyzmatdaşlygy pugtalandyrmakda hem-de tejribeleri alyşmakda möhüm ädime öwrüler.

Fransuz kompaniýalary bilen hyzmatdaşlyk taraplar üçin özboluşly mümkinçilikleri açar. Çünki Türkmenistanda kosmos ugrunyň ösüşine, tehnologiýalar dünýäsiniň gazananlaryna diýseň uly orun berilýär. Bu hakykat Fransiýanyň paýtagty Parižde geçýän Türkmenistanyň energetika toplumyna daşary ýurt maýa goýumlaryny çekmek boýunça halkara forumyň çäginde guralan duşuşyklarda hem aýdyň şöhlelendi.

https://turkmenportal.com/tm/blog/77177/parizhde-turkmenaragatnashyk-agentligi-bilen-fransuz-kompaniyalarynyn-arasynda-gepleshikler-gechirildi