Türkmenistanda Ermenistanyň medeniýet günleriniň geçirilmegi maslahatlaşyldy

2024-nji ýylyň 1-nji martynda Türkmenistanyň Ermenistan Respublikasyndaky Adatdan daşary we Doly ygtyýarly ilçisi Muhammetgeldi Aýazow Ermenistanyň bilim, ylym, medeniýet we sport ministri Žanna Andreasýan bilen duşuşdy.

Taraplar ikitaraplaýyn medeni-ynsanperwer, ylmy, bilim we sport ýaly birnäçe meselelere ünsi çekdiler.

Ilçi M.Aýazow türkmen edebiýatynyň nusgawy şahyry Magtymguly Pyragynyň doglan gününiň 300 ýyllygyna bagyşlanyp meýilleşdirilen çäreler üçin ministrlige berýän goldawy üçin minnetdarlyk bildirdi.

Iki ýurduň talyplarynyň we mekdep okuwçylarynyň dowam edýän tematiki olimpiadalara gatnaşmagy boýunça meseleler hem gozgaldy.

Taraplar Türkmenistanda Ermenistan Respublikasynyň Medeniýet günleriniň geçirilmegi boýunça hem pikir alyşdylar.

Sport pudagynda hyzmatdaşlygyň ösdürilmegi barada aýdylanda bolsa, ilçi Türkmenistanyň suwda ýüzmek boýunça ýygyndy toparynyň 2024-nji ýylyň mart aýynda Sahkadzor şäherindäki okuw-türgenleşik ýygnanyşygyna gatnaşmak üçin Ermenistana geljekdigini belledi. Şeýle-de diplomat ermeni hokkeýçilerini aprelde Aşgabat şäherinde geçiriljek halkara hokkeý ýaryşa çagyrdy.

Özara düşünişmek häsiýetinde geçen duşuşykda bilim, ylym, medeniýet we sport ugurlarynda hyzmatdaşlygy dowam etdirmek barada ylalaşyk gazanyldy.