Owganystanyň goňşy ýurtlarynyň daşary işler ministrleriniň duşuşygynyň gün tertibi Aşgabatda HHR-nyň ýörite wekili bilen ara alnyp maslahatlaşyldy

Golaýda Türkmenistanyň DIM-nde daşary işler ministriniň orunbasary Ahmet Gurbanow bilen Hytaý Halk Respublikasynyň DIM-niň Owganystan boýunça ýörite wekili Ýue Sýaoýunyň arasynda duşuşyk geçirildi.

Ara alyp maslahatlaşmalaryň esasy temalarynyň biri Owganystanyň goňşy ýurtlarynyň öňümizdäki daşary işler ministrleriniň formatyndaky 5-nji duşuşygynyň gün tertibi boldy.

Daşary işler ministriniň orunbasary Türkmenistanyň Owganystanda parahatçylygy berkitmek üçin köptaraplaýyn halkara platformalaryny goňşy ýurduň durmuş-ykdysady ýagdaýynyň durnukly dikelmegini we önuň ösüşini gowylandyrmakda möhüm esas hökmünde hasaplaýandygyny aýtdy. Şol bir wagtyň özünde, türkmen tarapyndan Owganystandaky parahatçylygy gurmak esasy üç ugryň: syýasy, ykdysady we sosial-ynsanperwerlik nukdaýnazaryndan seredilýär.

Birinjiden, Türkmenistan Owganystanyň täze häkimiýetleri bilen ýurtda durnuklylygy saklamaga we Owganystandaky içerki sazlaşygyň we bähbitleriň deňagramlylygyny gazanmagyň geljegini ýakynlaşdyrýan esasy faktor hökmünde gepleşikleriň ösdürilmegini goldaýar.

Ikinjiden, Owganystandaky parahatçylygy gurmak prosesi bu ýurdy iri infrastruktura taslamalaryny durmuşa geçirmek arkaly sebitleýin ykdysady integrasiýa proseslerine gatnaşmazdan seredilip bilinmez.

Üçünjiden, bu ýurtda parahatçylygy gurmagyň ynsanperwer bölegi bu işe elmydama oňyn täsir etdi.

Şol bir wagtyň özünde, türkmen tarapy sebitdäki parahatçylygy we howpsuzlygy üpjün etmek, terrorçylyga garşy göreş we biziň döwrümiziň beýleki wehimleri ýaly ygtyýarly owgan resmi wekilleri bilen maslahatlaşmak üçin mümkinçilikleri gözlemegi we peýdalanmagy zerur hasaplaýar. Bu barada Türkmenistanyň Daşary işler ministrliginiň web sahypasynda habar berilýär

Hytaýyň ýörite wekili Owganystanyň goňşy ýurtlarynyň daşary işler ministrleriniň bäşinji duşuşygyny Türkmenistanda geçirmegini öz ýurdunyň goldaýandygyny aýtdy. Ol Hytaý Owganystanyň gaýtadan dikeldilmegine kömek etmek üçin hyzmatdaşlygyny giňeltmegi dowam etdirýär diýip, belledi.

https://orient.tm/tm/post/68842/owganystanyn-gonsy-yurtlarynyn-dasary-isler-ministrlerinin-dususygynyn-gun-tertibi-asgabatda-hhr-nyn-yorite-wekili-bilen-ara-alnyp-maslahatlasyldy