Türkmenistanyň Demir ýol ulaglary ministrligi Hytaýyň "Huawei" tehnologiýa kompaniýasynyň wekilleri bilen gepleşikler geçirdi. Gepleşikleriň dowamynda taraplar Türkmenbaşy – Aşgabat – Türkmenabat ugruny hemmetaraplaýyn dörebaplaşdyrmak meselelerine seretdiler. Ugry tapgyrlaýyn elektrikleşdirmekden başga-da, Hytaý tarapy infrastruktura emeli aň tehnologiýalaryny ornaşdyrmagy we demir ýol aragatnaşygyny döwrebap FRMCS standartyna geçirmegi teklip etdi.

"Huawei" ulag pudagy üçin özüniň emeli aň platformasyny hödürläp, ünsüni üç sany esasy ugra gönükdirdi: gatnawlaryň howpsuzlygyny ýokarlandyrmak, amallary awtomatlaşdyrmak we enjamlaryň deslapky anyklaýyş (prediktiw diagnostika) ulgamy — ýagny ulgamyň tehniki näsazlyklary öňünden çyzmak ukyby.

Taraplar demir ýol aragatnaşyk standartlarynyň çalşylmagyny aýratyn ara alyp maslahatlaşdylar. Häzirki wagtda Aşgabat – Türkmenbaşy ugruna hyzmat edýän GSM-R standartynyň ýerine ýokary tizlikli we awtomatlaşdyrylan gatnawlar üçin niýetlenen has döwrebap FRMCS protokoly gelýär. "Huawei" bu geçişiň tapgyrlaýyn amala aşyryljakdygyna we täze infrastrukturany düýbünden gurman, eýýäm çekilen optiki-süýümli ulgamlary ulanmaga mümkinçilik berjegine ynandyrdy.

Gepleşiklerde kiberhowpsuzlyk meselesine hem deglip geçildi: kompaniýa öz çözgütleriniň maglumatlary üçünji taraplara bermezden, dolulygyna buýrujynyň infrastrukturasynyň içinde gurnalmagyna şert döredýändigini belledi. Mundan başga-da, hereket edýän milli kanunçylygy hasaba almak bilen, 1900 MGsi ýygylyk diapazonyny ulanmak barada bellenilip geçildi.

Duşuşyk türkmen-hytaý hyzmatdaşlygynyň berkeýän pursatlarynda geçirildi. Taraplar bilelikdäki infrastruktura taslamalaryny durmuşa geçirmäge özara gyzyklanma bildirýändiklerini tassykladylar.