«Astana Hub» halkara innowasiýa klasteri «Google for Startups» we Almaty şäheriniň häkimligi bilen bilelikde, Product-Market Fit we Scale tapgyrlaryndaky tehnologik startaplar üçin niýetlenen Silkway Accelerator intensiw ösüş maksatnamasynyň ýedinji tapgyryna ýüz tutmalaryň kabul edilip başlanandygyny yglan etdi.

Gatnaşmaga Türkmenistandan, Gruziýadan, Mongoliýadan, Azerbaýjandan, Täjigistandan, Özbegistandan, Gyrgyzystandan we Gazagystandan bolan toparlar çagyrylýar. Ýüz tutmalar 30-njy aprele çenli astanahub.com platformasynda kabul edilýär.

Gazagystan Merkezi Aziýada «Google for Startups» bilen bilelikde akselerasiýa maksatnamasyny amala aşyrýan ilkinji we ýeke-täk ýurtdur. Şu ýyl maksatnama ilkinji gezek Almaty şäherinde, «Almaty Hub»-yň binýadynda geçiriler. Akseleratoryň ýurduň günorta paýtagtyna geçirilmegi, şäheriň işjeň telekeçilik gurşawy we ösýän IT-jemgyýeti bilen ýurduň esasy işewürlik merkezleriniň biri hökmündäki ornuny görkezýär, şeýle hem ekoulgamyň geografiýasyny giňeldýär.

Silkway Accelerator eýýäm sebitde startaplary giňeltmegiň (masştabirleme) esasy guraly hökmünde özüni tanatdy. Maksatnamanyň amala aşyrylan dört ýylynyň dowamynda 1470 ýüz tutma gelip gowuşdy. Olardan diňe 73 startap saýlama tapgyryndan geçip, akselerasiýany tamamlady. Maksatnamanyň uçurymlary jemläp 48 million dollardan gowrak maýa goýumlaryny çekdiler, olaryň umumy bahasy bolsa 500 million dollardan geçdi. Taslamalaryň ýaýran çäkleri BAE, Türkiýe, ABŞ we beýleki ýurtlaryň bazarlaryny öz içine aldy. Uçurymlar durnukly ösüşi we halkara bazarlaryna çykyşy görkezýärler. Olaryň arasynda zypl.ai, Arlan Biotech, NB Fit, UvU, ApartX, Biometric Vision, TrustMe, Mirai Tech, Grand Mobile, Alaqan we beýleki taslamalar bar.

Maksatnama 12 hepde dowam edýär we taýýar önümi bolan, esasy görkezijilerini ösdürmegi, täze bazarlara çykmagy we işewürligini giňeltmegi maksat edinýän toparlara niýetlenendir.

Gatnaşyjylara hemmetaraplaýyn goldaw berilýär:

• Başga şäherli we halkara toparlar üçin Almatyda mugt ýaşaýyş jaýy we ofis;
• 100 000 dollara çenli möçberde «Google Cloud» resurslaryna we «Google Workspace» hyzmatlaryna elýeterlilik;
• Ösüş boýunça şahsy menejeriň goldawy.

Maksatnamanyň dowamynda toparlar önümi kämilleşdirmäge we ösüşi çaltlandyrmaga kömek edýän ekspertler bilen işleýärler.

«Gazagystan sebitde startap-ekoulgamy birnäçe ýyllap ulgamlaýyn ösýän az sanly bazarlaryň biridir: düzüm emele getirildi, akselerasiýa maksatnamalary işleýär, maliýeleşdirişe we halkara başlangyçlaryna elýeterlilik bar. Şu günki esasy wezipe — täze gurallary döretmek däl-de, startaplaryň hilini we toparlaryň giňelmäge bolan ukybyny ýokarlandyrmakdyr. Biziň tejribämize görä, esasy ýetmezçilik ideýalarda ýa-da resurslarda däl-de, bazara çykyş tapgyryndan geçmek we masştabirlenip bilýän modelleri gurmak ukybyndadyr. Silkway Accelerator hut şu tapgyr bilen işleýär — startabyň eýýäm taýýar önümi bar wagty, ösüş esasy wezipä öwrülýär», — diýip, Silkway Accelerator maksatnamasynyň öňdebaryjy trekerleriniň biri Ýewgeniý Frolow belledi.

Akselerasiýa Demo Day bilen tamamlanýar. Onda finalçylar öz çözgütlerini maýadarlaryň — wençur gaznalarynyň, biznes-perişdeleriň we strategik hyzmatdaşlaryň öňünde tanyşdyrýarlar. Iň geljegi uly startaplar bolsa maýa goýumlaryny çekmek mümkinçiligi bilen «Astana Hub Ventures»-iň gysga sanawyna (shortlist) girýärler.

Maksatnama barada has giňişleýin maglumat we ýüz tutma üçin salgy: Silkway Accelerator 2026.