Türkmenistanda sebitara ykdysady hyzmatdaşlyga bagyşlanylan forum geçirildi

Aşgabatda Türkmenistanyň hemişelik Bitaraplygynyň 30 ýyllygy mynasybetli «Halkara parahatçylyk we ynanyşmak ýyly: Durnukly ösüşi üpjün etmekde sebitara ykdysady hyzmatdaşlygyň orny» atly halkara maslahaty geçirildi. Söwda-senagat edarasynda geçirilen bu maslahata türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň gatnaşmagy onuň ähmiýetini has-da artdyrdy. Bu barada TDH ýazýar.

Foruma Türkmenistanyň Mejlisiniň Başlygy, Ministrler Kabinetiniň Başlygynyň orunbasarlary, ministrlikleriň we pudaklaýyn dolandyryş edaralarynyň, jemgyýetçilik guramalarynyň, köpçülikleýin habar beriş serişdeleriniň, Birleşen Arap Emirlikleriniň, Gazagystanyň, Gyrgyz Respublikasynyň, Täjigistanyň, Oman Soltanlygynyň döwlet edaralarynyň we iri kompaniýalarynyň, halkara guramalaryň we maliýe institutlaryň, Türkmenistandaky diplomatik wekilhanalaryň ýolbaşçylary hem-de wekilleri gatnaşdylar.

Foruma gatnaşyjylar Türkmenistanyň Prezidenti Serdar Berdimuhamedowyň bu möhüm halkara çäre mynasybetli iberen Gutlagyny uly üns bilen diňlediler. Türkmenistanyň Prezidenti öz Gutlagynda sebitara ykdysady hyzmatdaşlygyny ösdürmek maksady bilen geçirilýän bu halkara maslahatyň Merkezi we Günorta Aziýa döwletleriniň arasyndaky hoşniýetli gatnaşyklaryň has-da pugtalandyrylmagyna, ýangyç-energetika, üstaşyr ulag we üpjünçilik taslamalarynyň häzirki zaman ösüş ugurlaryny ara alyp maslahatlaşmaga hem-de oňa maýa goýumlaryny çekmäge giňden ýardam berjekdigini belleýär.

Şeýle-de Türkmenistanyň döwlet Baştutany maslahatyň sebitiň ýurtlarynyň ykdysadyýetleriniň ähli ulgamlarynda durnukly ösüşi üpjün etmekde, olara döwrebap innowasiýalary ornaşdyrmakda, maýa goýum mümkinçilikleri bilen bagly meselelerde özara tejribe alyşmak üçin möhüm meýdança öwrüljekdigine berk ynam bildirdi.

Maslahatyň esasy temalary sebitara ykdysady hyzmatdaşlyk meseleleri bolup, bu durnukly ösüşi üpjün etmek üçin strategiki ähmiýete eýedir. Forumyň gatnaşyjylary söwda, energetika, transport we ekologiýa ýaly ugurlarda bilelikdäki taslamalaryň geljegini ara alyp maslahatlaşdylar.

Hususan-da, döwrebap we durnukly ulag-aragatnaşyk geçelgelerini döretmäge hem-de energetiki howpsuzlygyny üpjün etmäge aýratyn üns berildi. Bu bolsa Durnukly ösüş maksatlaryna ýetmegiň çäklerinde Türkmenistanyň ileri tutýan ugurlary bolup durýar.