Türkmenistan bilen Gazagystanyň gümrük edaralarynyň arasynda deslapdan maglumat alyşylmaga badalga berildi

«Türkmenistan bilen Gazagystan Respublikasynyň arasynda geçirilýän harytlar we ulag serişdeleri babatda deslapky maglumatlary alyşmagyň Tehniki şertleriniň» türkmen tarapyndan gol çekildi.

Resminama, 25.10.2021 senedäki Türkmenistanyň Döwlet gümrük gullugy bilen Gazagystan Respublikasynyň Maliýe ministrliginiň arasynda Türkmenistanyň we Gazagystan Respublikasynyň arasynda geçirilýän harytlar we ulag serişdeleri babatda deslapky maglumatlary alyşmagy guramak hakynda Ylalaşygyň düzgünlerini ýerine ýetirmegiň çäginde işlenip taýýarlandy.

Türkmenistanyň Döwlet gümrük gullugynyň habar bermegine görä, tehniki şertler iki döwletiň gümrük edaralarynyň arasynda alyşylmaly maglumatlaryň düzümini tassyklaýar. Maglumat alyşmagyň tertibi, görnüşi, usullary we wagty kesgitlendi.

Deslapdan maglumat alyşmak iki tapgyrda amala aşyrylar. Birinji tapgyrda eksport deklarasiýalary alyşylar, ikinji tapgyrda üstaşyr deklarasiýalary alyş-çalyşy amala aşyrylar.

Deslapky maglumatyň birek-birege berilmegi Türkmenistan bilen Gazagystanyň arasyndaky daşalýan harytlaryň gümrük taýdan resmileşdirme işini çaltlandyrar diýip garaşylýar.