Türkmenabadyň himiýa kärhanasynda 2024-nji ýylda ýokary görkezijiler gazanyldy

Türkmenabadyň S.A.Nyýazow adyndaky himiýa kärhanasynda 30-dan gowrak görnüşli önüm öndürilýär. Ol ýurtdaky fosforly dökünleri öndürýän ýeke-täk kärhana bolup, 2024-nji ýylda bu möhüm önümiň 170 müň tonnadan gowragyny öndürip, sarp edijilere ugratdy. Bu barada türkmen metbugatynda habar berildi.

Amyderýanyň sag kenaryndaky gazy gaýtadan işleýän Samandepe, Ýaşyldepe meýdançalarynda ýeriň aşagyndan tebigy gaz bilen ýokary çykýan sary kükürdiň uly gorlarynyň emele gelmegi himiýa kärhanasynda ýene-de bir täze önümçiligiň döremegine sebäp boldy. 2024-nji ýyl bu kärhanada öndürilen kükürt kislotasynyň möçberi has-da artyp, ol 184,1 müň tonna barabar boldy.

Kärhananyň kükürt kislotasyny daşamak üçin ýörite demir ýol çeleklerini edinmegi bolsa geljekde bu önümi daşarky bazara çykarmaga-da mümkinçilik berýär.

Himiýa kärhanasynyň öndürýän ýene-de bir möhüm döküni «oksigumat» diýlip atlandyrylýar. 2024-nji ýylyň dowamynda onuň hem 340 tonnasy öndürilip, dürli ölçeglerdäki gaplarda sarp edijilere ýetirildi.

Bu ýerde aýakgaplary ýaglamak we reňklemek üçin ulanylýan dürli görnüşli kremleriň önümçiligi-de ýola goýuldy. Türkmenabadyň gowaça çigidini gaýtadan işleýän ýag-ekstrakt kärhanasynda öndürilýän çigit ýagynyň kislotasy we nebit önümleri gaýtadan işlenende emele gelýän parafin aýakgap kremlerini öndürmekde esasy çig mal bolup hyzmat edýär.

2024-nji ýylyň dowamynda kislorodyň 225,840 müň kub metri öndürilip, sarp edijilere ugradyldy. Lagym ulgamy üçin öndürilýän polietilen turbalar, polietilen plýonkalar, üwelen hek ýaly halk hojalygyna zerur bolan önümler kärhana uly girdejileri-de getirýär. Diňe bir Lebap welaýatynyň çäginde gurlan ýyladyşhanalaryň umumy meýdany 300 gektara golaýlap barýar. Olaryň ählisini-de polietilen plýonkalar bilen üpjün etmek hem hut şu kärhananyň paýyna düşýär. Şonuň üçin kärhana her ýylda polietilen plýonkanyň 2 müň tonnadan gowragyny öndürýär.