Türkmenistan sanly tehnologiýalary ösdürmeklige uly ähmiýet berýär

«Türkmenaragatnaşyk» agentliginiň başlygy Hajymyrat Hudaýgulyýew «Turkmentel-2024» forumynyň 17-nji Halkara maslahatynyň umumy mejlisinde çykyş edip, ýurduň ösüşi üçin sanlylaşdyrmanyň we kiberhowpsuzlygyň ähmiýetini nygtady. Öz çykyşynda ol sanly tehnologiýalaryň bilimden başlap, saglygy goraýyş ulgamyna çenli durmuşyň ähli ugurlaryny özgerdýändigini we akylly şäherleriň hem-de netijeli senagatyň döredilmegi üçin esas bolup durýandygyny belledi.

Hudaýgulyýew geçen ýyl Türkmenistanyň ilkinji «akylly» şäheri bolan we eýýäm halkara derejesinde ykrar edilen Arkadag şäheriniň açylandygyny ýatlatdy. Şeýle hem ol tutuş ýurt boýunça ýokary tizlikli internetiň giňeldilmegi we 5G tehnologiýalarynyň ornaşdyrylmagy boýunça meýilnamalaryň bardygy barada gürrüň berdi.

Sanly tehnologiýalar babatda hünärmenleri taýýarlamak hem möhüm ugra öwrüldi. Ýurdumyzda orta mekdepleriň okuwçylary we ýokary okuw mekdepleriniň talyplary üçin IT-bäsleşikleri we startap maksatnamalary geçirilýär.

Mundan başga-da, milli derejede kiberhowpsuzlygy üpjün etmäge güýçli üns berilýär.

«Biz bu ugurda halkara hyzmatdaşlygyny dowam etdirmäge açykdyrys we bu maslahatda beýan ediljek teklipleri alyşmak hem-de täze çözgütleri gözlemek üçin üstünlikli meýdança boljakdygyna bil baglaýarys» - diýip, Hudaýgulyýew çykyşyny jemläp, belledi.

Telearagatnaşyk, telemetriýa, maglumat tehnologiýalarynyň we teleradioýaýlym enjamlarynyň «Turkmentel-2024» 17-nji Halkara sergisi hem-de ylmy maslahaty 14-16 noýabr aralygynda Aşgabatda geçirilýär. Maslahatyň dowamynda degişli ministrlikleriň we pudak edaralarynyň, pudaklaýyn kompaniýalaryň, halkara guramalarynyň wekilleri, bilermenler görkezilen pudaklarda ösüşiň esasy ugurlary we olaryň geljegi barada pikir alyşýarlar.