«Ýewraziýa multimodal ýük daşamalarynyň ösüşiniň täze maksatlary» webinary: seljerme we geljegiň mümkinçilikleri

Ýäkynda «Türkmen Logistika» assosiasiýasy bilen Transýewraziýa ýük daşamalary boýunça Halkara Utgaşdyryjy geňeşi (TÝHUG) tarapyndan «Ýewraziýa multimodal ýük daşamalarynyň ösüşiniň täze maksatlary» atly webinar guraldy.

Çärä köp sanly taraplar — ýokary derejeli işgärler we ulag kompaniýalarynyň ýolbaşçylarydyr menejerleri gatnaşdylar. TÝHUG-a gatnaşmak üçin 25 döwlet edarasyndan we Russiýanyň, Belarusyň, Gazagystanyň, Koreýa Respublikasynyň, Germaniýanyň we Mongoliýanyň hususy ulag bölümlerinden 60 wekili çagyryldy.

Türkmen tarapyndan 30-a golaý wekil — Türkmenistanyň deňiz we derýa ýollarynyň mümkinçiliklerini utgaşdyrýan agentliginiň, Türkmenbaşy Halkara deňiz portunyň hünärmenleri, şeýle hem ulag we logistika kompaniýalarynyň, «Türkmen Logistika» assosiasiýasynyň agzalary gatnaşdylar.

Birinji sessiýa «Demirgazyk — Günorta» halkara ulag geçelgesiniň mümkinçiliklerine bagyşlandy. Bu ýerde çykyş eden Russiýa Federasiýasynyň Ulag ministrliginiň Halkara hyzmatdaşlygy departamentiniň müdiri Alekseý Sapetko we «Russiýa demir ýollary» açyk görnüşli paýdarlar jemgyýetiniň ulag hyzmat merkeziniň başlygynyň birinji orunbasary Aleksandr Hatýanow gatnaşyjylary «Demirgazyk — Günorta» halkara ulag geçelgesiniň häzirki ýagdaýy hem-de Eýranyň we Türkmenistanyň çäklerinden geçýän ugurlar boýunça haryt daşamagyň geljegi bilen tanyşdyrdylar.

«Demirgazyk-Günorta» halkara ulag geçelgesiniň gündogar ugry boýunça ýük dolanyşygyny giňeýär. 2023-nji ýylyň 10 aýy üçin bu ugurda konteýner daşamagyň netijeleri 15% ýokarlandy» — diýip, Sapetko habar berdi.

Onuň sözleri Türkmenistan bilen aragatnaşykda ýük daşamagyň ösýändigini hem tassyklaýar.

«Täze tehnologiýalary ornaşdyrmak arkaly «Demirgazyk-Günorta» halkara ulag geçelgesiniň gündogar şahasy boýunça haryt daşamagyň hasabyna bize çykdajylary we üstaşyr wagty azaltmak başartdy. Serhet geçelgelerinde ýük daşamak tehnologiýasyny optimizirlemek we elektron bellikleri girizmek boýunça uly ätiýaçlyklar galýar» — diýip, Hatýanow belledi.

TÝHUG bilen «Türkmen Logistika» assosiasiýasynyň arasynda hyzmatdaşlygy ösdürmegiň, «Demirgazyk-Günorta» halkara ulag geçelgesi boýunça ýük daşamagy ösdürmek we halkara ulag hyzmatlary bazarynda logistika hyzmatlaryny kämilleşdirmek boýunça çäreleri bilelikde alyp barmagyň ähmiýeti bellendi.

Ikinji sessiýa Türkmenbaşy halkara deňiz portuna bagyşlandy. Bu ýerde portuň başlygy Seýitguly Baýseýidow çykyş edip, onuň mümkinçilikleri we Ýewraziýanyň üstünden uzaýan ulag ýollarynyň halkalaryndaky möhüm ornuny jikme-jik düşündirdi.

«Türkmenbaşy Halkara deňiz porty — Transýewraziýa ulag ýollarynyň möhüm merkezi» — diýip, Baýseýidow belledi. Şeýlelik bilen, Türkmenbaşy Halkara deňiz portunyň konteýner terminalynyň bir ýyl üçin geçirijilik kuwwaty 400 müň TEU barabar boldy.

Mundan başga-da, webinara gatnaşyjylara ulag we logistika kompaniýalarynyň — «Türkmen Logistika» assosiasiýasynyň agzalarynyň hyzmatlary hödürlendi.