Demirýolçularyň Kärdeşler arkalaşygynyň Geňeşi bilen «Türkmeniň ýüpek ýoly» gazetiniň redaksiýasy döredijilik bäsleşigini yglan edýärler

Türkmenistanyň Kärdeşler arkalaşyklarynyň Milli merkeziniň Demirýolçularynyň Kärdeşler arkalaşygynyň Geňeşi bilen «Türkmeniň ýüpek ýoly» gazetiniň redaksiýasy Gündogaryň beýik akyldary, nusgawy şahyrymyz Magtymguly Pyragynyň doglan gününiň 300 ýyllygyny hem-de «Pähim-paýhas ummany Magtymguly Pyragy» ýylyny dabaralandyrmak maksady bilen Ulag we kommunikasiýa pudagynyň işgärleriniň publisistik makalalaryny, hekaýalaryny çap etmegi nazarda tutup, «Magtymguly Pyragy — ak ýollaryň çyragy» atly döredijilik bäsleşigini yglan edýärler:

BÄSLEŞIGIŇ DÜZGÜNNAMASY:

I. Umumy düzgünler

1. Bäsleşigiň maksady Gündogaryň beýik akyldary we söz ussady Magtymguly Pyragynyň umumadamzat ähmiýetli edebi mirasynyň ähmiýetini çeper sözüň üsti bilen beýan etmekden ybarat.

2. Bäsleşige hödürlenilýän işlerde türkmen halkynyň Milli Lideri Gahryman Arkadagymyzyň, hormatly Prezidentimiz Arkadagly Gahryman Serdarymyzyň dana akyldaryň eserlerini dünýä ýaýmakda amal edýän işleri, beýik Pyragynyň eserlerinde milli ýol-ýörelgelerimiziň şöhlelenilişi, gadymy Ýüpek ýolunyň yzlary we häzirki bagtyýar zamanamyzda ulag ulgamyndaky ýetilen sepgitler, üstünlikler wasp edilmelidir.

3. Bäsleşige döredijilik bilen meşgullanýan ulag we kommunikasiýa ulgamynyň ähli işgärleri gatnaşyp bilerler.

II. Bäsleşigiň şertleri

Bäsleşik üç ugur boýunça geçirilýär:

— iň gowy makalalar;

— iň gowy hekaýalar we rowaýatlar;

— iň gowy goşgular.

Bäsleşige hödürlenilýän makalalar, hekaýalar we rowaýatlar, goşgular döredijilik işlerine bildirilýän talaplara laýyk gelmelidir, çeperçilik, many-mazmun taýdan ýokary derejede bolmalydyr.

Bäsleşige ozal metbugatda çap edilmedik döredijilik işleri hödürlenmelidir.

Bäsleşige hödürlenilýän işler iberilende çap edilen hem-de elektron göterijide bolmalydyr. Bäsleşige gatnaşmaga isleg bildirýän işgäri familiýasyny, adyny, atasynyň adyny, doglan senesini, wezipesini, ylmy derejesini, iş we öý salgysyny hem-de telefon belgisini görkezmelidir we döredijiligini «Türkmeniň ýüpek ýoly» gazetiniň redaksiýasyna gowşurmalydyr.

III. Bäsleşigi geçirmegiň we onuň jemini jemlemegiň tertibi

Bäsleşige hödürlenilen işler döredijilik işgärlerinden düzülen ýörite topar tarapyndan seljeriler. Eserleriň has tapawutlananlary «Türkmeniň ýüpek ýoly» gazetinde çap ediler.

Bäsleşigiň jemi şu ýylyň noýabr aýynda ýurdumyzda bellenilýän Bütindünýä durnukly ulag gününe gabatlanyp jemlener we ýeňijilere baýramçylyga bagyşlanyp geçiriljek döwlet çäresinde sylaglar dabaraly ýagdaýda gowşurylar.

Bäsleşigiň ýeňijileri baş baýrak, I, II we III orunlara mynasyp bolanlara Türkmenistanyň Kärdeşler arkalaşyklarynyň Milli merkeziniň Hormat hatlary we gymmatbahaly sowgatlary bilen sylaglanarlar.

Habarlaşmak üçin telefon belgilerimiz: 38-41-86; 39-04-75.